Thursday, November 19, 2015

Resolution - ගහණතාවය ( විභේදනය )

රෙසොලූෂන් කියන දේ සම්මතයේ තිබුනේ බෝහෝ කළෙකට පෙර සිට වුව ද, එය අපේ භාවිතයට ආවේ ඩිජිටල් ඡායාරූප මුද්‍රණ තාක්ෂණය ලංකාවේ ස්ථාපිත වූවා ට පසුව ය.

මධුර ඹන්ලයින් ඩික්ෂනරියට අනුව රෙසොලූෂන් Resolution යන්නට තේරුම් බොහෝ ගණනක් ඇති වග අපට පෙනෙයි.

නමුත් අපට එය වැදගත් වන්නේ ඩිජිටල් කැමරාවෙන් ලබා ගත් ප්‍රතිරූප සංස්කරණය කරන්නට වෙනත් මෘදුකාංගයක දිග හැර ගත් විට ය.

මා  Resolution යන්න පරිවර්තනය කරන්නේ ඒ අනුව ය. විභේදනය ද හරි ය. නමුත් වඩා ගැලපෙන්නේ ගහණතාව යන වචනයයැයි මම සිතමි.

වැඩියෙන් ම අප ප්‍රතිරූප හෙවත් ඉමේජ ගණුදෙනු කරන්නේ ෆොටෝෂොප් Photoshop නම් වූ අතිප්‍රසිද්ධ මෘදුකාංගය සමග ය. Lightroom සමග වැඩ කරද්දී මේ රෙසොලූෂන් කතාව එන්නේ එහි අවසන් සංස්කරණ ගොනුව සේව් කිරීමේ දී ය.

ඕනෑ ම ඩිජිටල් ප්‍රතිරූපයක් සෑදි ඇති කුඩා ම ඒකකය වන්නේ Pixel පික්සලයයි. පික්සලය යන්න නාමික ඒකකයක් වන අතර,  ඊට සම්මත දිගක්, පළලක්, හැඩයක් නැත. ඩිජිටල් කැමරාවකින් අපට ලැබෙන ප්‍රතිරූපයේ ප්‍රමාණය Image Size මනිනු ලබන්නේ මෙගා පික්සල් Megapixel (Mp) වලිනි. එනම් එම ප්‍රතිරූපයේ ඇති සම්පූර්ණ පික්සල් ප්‍රමාණයයි. මේ පික්සල් ප්‍රමාණය ගණනය කරනු ලබන්නේ එහි දිග පැත්තේ සහ පළල පැත්තේ ඇති පික්සල් ප්‍රමාණය වැඩි කිරීමෙනි.  පරිගණකය ඉහත ප්‍රතිරූපය ගබඩා කර ගන්නේ එම පික්සල් ප්‍රමාණයෙන් පමණ ය. (දිග පැත්තේ පික්සල් x පළල පැත්තේ පික්සල් = මෙගාපික්සල් ) ඒ සඳහා වැය වන ඉඩ හෙවත් මතක තබා ගත යුතු ප්‍රමාණය ඉමේජයේ ප්‍රමාණය මත කිලෝබයිට් KB, මෙගාබයිට් MB, ගිගාබයිට් GB වශයෙන් සඳහන් කෙරේ. මේ උදාහරණ පින්තූර දෙකෙන් පෙන්වන්නේ එම ආකාරයයි.


 මෙය සරල උදාහරණයක් ලෙස දක්වන්නේනනම්, බිම ඇතිරූ බිම් උළු හෙවත් ටයිල් ගොඩක් ගැන සිතන්න. ඕනෑ ම ටයිල් එකකට සම්මත දිග පළලක් තිබේ. එය Pixel Aspect Ratio නමින් හඳුන්වන අතර අප ඩිජිටල් ප්‍රතිරූපයක මේ දිග පළල අතර අනුපාතය සමාන හෙවත් එය හරි හතරැස් ලෙස සළකන්නෙමු. අප උදාහරණය දැක්වීමට ගෙනා ටයිල් එකක දිග පලල ද හරි හතරැස් යැයි ද සිතමු. මුලු ප්‍රමාණය ම දැන් බිම අතුරා ඇත. අපි ටයිල් කොපමණ ගෙන ආවාදැයි අපි දනිමු. එය ටයිල් දහසක්නම්  දැන් මේ ටයිල් ගොඩ අපට විවිධ දිග පළල ප්‍රමාණයකින් ඇතිරිය හැකි ය. ඒ අතුරන දිගෙහි සහ පළලෙහි අනුපාතය අහ හඳුන්වන්නේ එහි රේෂියෝ Ratio එක නමිනි.  බිම අතුරා ඇති ටයිල් කන්දරාවේ එක් පාදයක ටයිල් 100ක් ඇතිනම් අනෙක් පාදයේ ඇත්තේ ටයිල් 10කි. එක පාදයක ටයිල් තිබෙන්නේ 40ක්නම් අනෙක් පාදයේ තිබෙන්නේ 25කි. 

දැන් මේ ටයිල් බිම ඇතිරී ඇති දිග ද අපට කිසියම් ක්‍රමයකට මැන බැලිය හැකි ය. ඒ වර්ග අඩි හෝ වර්ග යාර ආකාරයට ය. වර්ග අඩියක එක් පාදයක් අඩියක් වන අතර, පළල ද අඩියකි හෙවත් සම චතුරස්‍රයකි. උදාහරණ ටයිල් එක අඟල් 6ක්නම්, එය වර්ග අඩියක වපසරිය තුළ එක් පැත්තකට දෙකක් වන සේ ටයිල් 4ක් තිබේ. අපි එය වඩා පහසු ආකාරයකට මෙසේ කියමු. වර්ග අඩියකට ටයිල් 4යි..... ටයිල්වල රෙසොලූෂන් ය කියන්නේ එයට ය....!!!

ප භාවිතා කරන DSLR කැමරාවක මේ අනුපාතය 3:2කි. සරල කම්පැක්ට් Compact ඩිජිටල් කැමරාවක අනුපාතය 4:3කි. එනම් DSLR කැමරාවක මේ අනුපාතය 3:2ක අනුව දිග පාදය තුනක් වන විට පළල පාදය දෙකක් වෙයි. ඉමේජයේ සම්මත පික්සල් ප්‍රමාණය වෙනස් නොවී, අපට එය දිග පළල අතර අනුපාතය රකිමින් දිග හැරිය හැකි ය. 

කැමරාවේ ඇති මෘදුකාංගය මගින් අදාල ඩිජිටල් දත්ත Process කර, දත්ත සමුච්ඡයක් ලෙස ගබඩා කරන්නේ එන්කෝඩින් Encoding මෘදුකාංගයක් මගින් නිවැරදි ව හැකිලීමෙනි. මේ එන්කෝඩින් මෘදුකාංගය Nikon කැමරාවල එක් ආකාරයකටත්, Canon කැමරාවල තවත් ආකාරයකටත් ක්‍රියාත්මක වෙයි. මේ දත්ත ප්‍රමාණය ෆොටෝෂොප් Photoshop වැනි මෘදුකාංගයකදී දිග හැර දෙන්නට උදව් වන්නේ ඩිකෝඩින් Decoding මෘදුකාංගයකි. එයින් Canon ඉමේජ 72ppi ලෙසත් Nikon ඉමේජ 300ppi ලෙසත් දිග හරියි. නමුත් මේ ඉමේජවල ප්‍රමාණය හෙවත් එහි දිග පළල ඒ අනුව වෙනස් අගයන් ගනියි. නමුත් ඇත්තේ එක ම පික්සල් ප්‍රමාණයකි.
 


72ppi (Pixel per Inch) යනුවෙන් හඳුන්වන්නේ වර්ග අඟලක එක් පාදයක පික්සල් 72ක් ඇත යන්න ය. නමුත් මුද්‍රණයේදී මෙය හැඳින්වෙන්නේ වර්ග අඟලක එක් පාදයක ඇති තිත් සංඛ්‍යාව DPI  / dpi (Dot Per Inch) ලෙසිනි.මුද්‍රණයේදී සිදු වන්නේ වර්ග අඟලක ඇති පික්සල් සංඛ්‍යාව තිත් ලෙස මුද්‍රණය කිරීම ය.

අපට ඡායාරූප මුද්‍රණය කිරීමේ දි ප්‍රධාන ආකාර 4ක් හමු වෙයි.
01 RA4 තාක්ෂණයේ රසායනික ව සාමාන්‍ය ඡායාරූප මුද්‍රණ ක්‍රමය.
02. නූතන Dry Printing වියළි මුද්‍රණ/ Direct Printing ඍජු මුද්‍රණ ලෙස හඳුන්වන, කෙලින් ම කඩදාසිය මත තීන්ත විදින ඉන්ක්ජෙට් Inkjet ඡායාරූප මුද්‍රණ ක්‍රමය.
03 ලේසර් මුද්‍රණ ක්‍රමය.
04. ඕෆ්සෙට් මුද්‍රණ ක්‍රමය.

මෙහි 01 හා 02 ආකාර දෙකේදී ම, ඡායාරූපයක් මුද්‍රණය වන්නේ අඛණ්ඩ තාන Continues Tone ලෙසිනි. 
03 හා 04 ආකාර දෙකේ දී, කිසියම් වර්ණයක අඩු වැඩි කම මුද්‍රණය වන්නේ තිතක ලොකු කුඩා බව මත ය. එහි සෑම තිත් දෙකක් අතර ම හිස් තැනක් තිබේ. එනිසා මේ ක්‍රම හැඳින්වෙන්නේ අර්ධ තාන Half Tone නමිනි.  

සාමාන්‍ය හොඳ පෙනීමක් ඇති කෙනෙකුට, සුදු කඩදාසියක් මත, මිමී 0.25ක තිතක් තබ‍ා, සෙමී 30ක සම්මත කියවීම් දුර Standard Reading Distance සිට බැලූ විට, එය තිතක් ලෙස දැකිය හැකි ය. එමෙන් ම මිමී 0.25ක දුරින්, මිමී 0.25ක තවත් තිතක් තැබූ විට, එය තිත් දෙකක් ලෙස හඳුනාගන්නේ නැත. ඔහුට එය පෙනෙන්නේ තානයක් හෙවත් ටෝන් එකක් ලෙසිනි. 

 මුද්‍රණයක තිබිය යුතු මේ තිත් ගහණතාව තීරණය වනුයේ මුද්‍රණය වන කඩදාසි වර්ගය අනුව ය. (ඕෆ්සෙට් මුද්‍රණ ගැන මීට වඩා දීර්ඝ විස්තරයක් ඇති අතර, එතරම් සංකීර්ණ කරුණු සාමාන්‍ය ඡායාරූප ශිල්පියකුට වැදගත් නොවේයැයි උපකල්පනය කොට කෙටි කරමි.) ඕෆ්සෙට් මුද්‍රණයේ දී ආර්ට් පේපර් නමින් හැඳින්වෙන ඔප කඩදාසියක මුද්‍රණය වන්නේ අඟලකට තිත් 300කිනි. ඊටත් වඩා ඕෆ්සෙට් මුද්‍රණ තාක්ෂණයේ දී සයන්, මැජෙන්ටා, යෙලෝ සහ කළු වර්ණ වෙන වෙන ම තිත් ලෙස මුද්‍රණය වෙයි. එය වර්ග අඟලකට තිත් පේලි ලෙසිනි. එය හඳුන්වන්නේ මුද්‍රණයක ස්ක්‍රීනින් වැලියු Screening Value ලෙස ය. එහි ඒකකය වන්නේ අඟලකට ඇති තිත් පේලි හෙවත් Lines Per Inch (LPI / lpi) ය.

මේ අනුව ආර්ට්පේපර් මත මුද්‍රණයක් සිදු කිරීමේදී එහි ස්ක්‍රීනින් වැලියු එක 150 LPI ක් සෑහෙන අතර, අප පත්තර කඩදාසි ලෙසින් හඳුන්වන ඩිමයි කඩදාසියක මුද්‍රණය කිරීමට 85 LPI හොඳට ම සෑහේ. මේ දෙවර්ගයට අනුව කිසියම් ඉමේජයක් සකසන්නේනනම් එහි රෙසොලූෂන් ප්‍රමාණය ස්ක්‍රීන් වැලියු එක මෙන් දෙගුණයක් විය යුතු ය.

මුද්‍රණ ගහණතාවය Printer Resolution වඩා වැදගත් වන්නේ මුද්‍රණය දෙස අප බලන දුර සහ අප සිටින වාතාවරණය අනුව ය. අප සාමානයයෙන් යමක් බලන දුර අනුවනම් එහි රෙසොලූෂන් එක 300ක් විය යුතු ය. අඩි 10ක් පමණ දුර සිට නරඹන කටවුට් එකක රෙසොලූෂන් එක 72ක්තිබීමත් සෑහෙයි. එම කටවුට් එක ම, අපි අඩි 60ක දුරක සිට, පැයට කිමී 60ක වාහනයක් ගමන් කරමින් සිටිමින් ම නරඹන්නේනනම් එහි රෙසොලූෂන් එක 06ක්තිබීමත් හොඳට ම සෑහෙයි...!!

ප්‍රතිරූප සංස්කරණයේ දී ප්‍රතිරූපය හෝ කොටසක් හෝ නැවත ලොකු කුඩා කිරීමේදී ද Re Size අප වඩාත් ම සැළකිලිමත් විය යුතු ය. කිසිදු විටෙක කුඩා ප්‍රතිරූපයක් විශාල කිරීමෙන් හොඳ ප්‍රතිපලයක් ලබා ගත නොහැකි ය. ඉමේජය කුඩා කිරීමේ දී සිදුවන්නේ එහි තිබෙන පික්සල් කුඩා වීම නොවේ. ඉමේජයේ ඇති පික්සල් ඉවත් වීම ය. මේ ඉවත් කිරීම සිදු කරන්නේ අදාල මෘදුකාංගයෙනි. ඒ පික්සල් ඉවත් වීම නිසා සිදුවන හානිය අපට නොපෙනෙන්නේ ඉමේජය කුඩා වන නිසා ය.

මෙසේ කුඩා කළ ඉමේජය හෝ කොටස හෝ අපට ඉතා පහසුවෙන් නැවත විශාල කර ගන්නට පුලුවන. නමුත් එහි ඉවත් වූ පික්සල නැවත ඊට එකතු වන්නේ නැත. ඒ වෙනුවට මෘදුකාංගයේ Dithering පහසුකම මගින්, හිස්තැන්වල ඇති වර්ණ, අවට වර්ණ පික්සලවලට අනුව,  පුරවා ගනී. එවිට අපට අවසානයේ ලැබෙන්නේ කිසිදු තියුණු කමක් නැති හොඳට ම බොඳ වූ ප්‍රතිරූපයකි.

මේ දැක්වෙන්නේ එකම ඉමේජයක් කුඩා කොට, පසු ව එය නැවතත් මුල් ප්‍රමාණයට ම විශාලනය කළ විට සිදු වන දේ ය.


මේ ලිපිය ලියනු ලැබුවේ රෙසොලූෂන් ගැන කෙනෙකු ඇසූ පැනයකට පිළිතුරක් වශයෙනි.
ඉමේජ සම්බන්දයෙන් මීටත් වඩා ගැටලු ඇතිනම්, ඒවා ඉදිරිපත් කළ විට, මේ ලිපිය ම නැවත සංස්කරණය කොට පල කළ හැකි ය.

ඉන්ද්‍රනාථ තේනුවර.


Share/Bookmark

Wednesday, June 5, 2013

ෆොටෝෂොප් CS5 සහ CS6 භාවිතයෙන් ෆෝකස් ස්ටැක් Focus Stack කිරීම

අප අතිශයින් සමීප ඡායාරූපයක් ගත් විට, එහි විවරය අනුව අපට ලැබෙන ඡායාරූපයේ ක්ෂේත්‍ර ගැඹුර අතිශයින් අඩු බව අපි දනිමු. නමුත් සමහර විට, මෙවන් සමීප රූපයක වුව ද, එහි වඩා විස්තරාත්මක ඡායාරූපයක් අපට පෙන්වන්නට හෝ ගන්නට සිදු වූ විටෙක අප බොහෝ අසරණ වන්නේ ය.

ඊට විකල්පයක් ලෙස ෆොටෝෂොප් CS5 සහ CS6වන සංස්කරණය භාවිතයෙන් අපට පින්තූර ගණනාවක් අසුරු සැණින් එකම තලයක් මත අලවා ගන්නට පහසුකම් සලසා දෙයි.

පළමුවෙන් ම අප අපට අවශ්‍ය කරන ඡායාරූපය ගැන මූලික සැලැස්මක් සාදා ගත යුතු ය. සජීවී කුඩා සතකු හෝ චලනය වන වස්තුවක හෝ එවන් පින්තූරයක් ගැනීම ද දුෂ්කර ය. එනිසා නිශ්චල වස්තුවක සැලසුම් සහගත ව ස්ටැක් කළ යුතු ඡායාරූප ගැනීම පහසු ය.

ඡායාරූප ගත කිරීමට පෙර කැමරාව ත්‍රිපාද පීඨයක කවි කර ස්ථාවර රාමුවක් සකසා ගන්න. දැන් ඔබට ඡායාරූප ගත කළ යුතු වස්තුව දෙසට කැමරාව මානන්න. ඉන් පසු අනාවරණ දත්ත ගැන සැලකිළිමත් ව බලා, නිවැරදි අනාවරණ සැකසුම් දෙන්න. කාචයේ ඕටො ෆෝක්ස් පහසුකම ඕෆ් කර, එය මැනුවල් ආකාරයට සකසන්න.

දැන් ඔබට අවශ්‍ය වස්තුවේ කැමරාවට ආසන්න ම ස්ථානයේ සිට, ක්‍රමයෙන් ඈතට යන සේ එකින් එක සීරුවෙන් නාභි ගත කරමින් ඡායාරූප කිහිපයක් ම ගන්න. මෙසේ පින්තූර ගනිද්දී, කාචය සූමි වීම හෝ, කැමරාව සෙලවීම හෝ අරමුණ සෙලවීම වැනි දෝෂ හැකි තරම් අවම කර ගන්න.

දැන් ෆොටෝෂොප් CS6 මෘදුකාංගය විවෘත කර ගන්න. ඉන්පසු ඔබ මුලින් ම ගත් ඡායාරූපය ඒ මතට ඩ්‍රෑග් කරන්න. එවිට එය නව කැන්වසයක් ලෙසින් එහි විවෘත වෙයි. ඊට පසු අනෙක් පින්තූර සියල්ල ම සිලෙක්ට් කොට, එක වර මේ කැන්වසය මතට ඩ්‍රෑග් කරන්න. එවිට ඒවා එකින් එක ස්මාට් ඔබ්ජෙක්ට් Smart Object ලෙසින් විවෘත වෙයි. සෑම පින්තූරයක් ම විවෘත කර ගන්නට එකින් එකට එන්ටර් යතුර ඔබන්නට ද ඔබට සිදු වෙයි. 


 දැන් ලේයර් පැලටය දෙස බලන්න. එහි ඔබේ සියලු ම ඡායාරූප ස්මාට් ටැග් ලේයර් ලෙසින් දිස් වෙයි. 

ඒ සියල්ල සිලෙක්ට් කොට ඒ මත රයිට් ක්ලික් කරන්න. මතු වන මෙනුවෙන් ඒ සියල්ල රැස්ටරයිස් Rasterize කරන්න. 


 ඊට පසු එඩිට් මෙනුවට යන්න. එහි මැද හරියේ ඇති ඕටො එලයින් ලේයර්ස් Edit > Auto Aline Layers විධානය සක්‍රිය කරන්න. 

 එවිට මතු වන සංවාද කොටුව දෙස බලා, වඩා නිවැරදි සැකැස්ම දෙන්න. 

කැමරාව ට්‍රයිපොඩ් කොට ඇත්නම් එහි ඕටො විකල්පය දීම හොඳටම සෑහෙයි. දැන් මේ කැන්වසය මත ඇති ලේයර් සියල්ල හරියට ම එක මත සිටින සේ සැකසෙයි.

ඉන් පසු යළිත් එඩිට් මෙනුවට යන්න. එහි ඇති ඕටෝ බ්ලෙන්ඩින් ලේයර්ස් Edit > Auto Blending Layers විධානය සක්‍රිය කරන්න.


 එවිට ද සංවාද කොටුවක් මතු වෙයි. එහි ස්ටැක් Stack විකල්පය තෝරා ගන්න.


 ඊට පසු ස්වල්ප වේලාවක් ගත වී, සියලු ම ලේයර මත ස්වයංක්‍රීය ව මාස්ක් සෑදී, මුල සිට අග දක්වා ම නිවැරදි ව නාභි ගත වූ ඡායාරූපයක් මොනිටරය මත දිස් වෙයි.....!!!!



Share/Bookmark

Friday, October 12, 2012

ආලේඛ්‍ය ඡායාරූප පණ ගැන්වීම 01 (කළු සුදු)


ආලේඛ්‍ය ඡායාරූපකරණය යනු ඡායාරූප විෂයය ක්ෂේත්‍රයේ ඇති වැදගත් ම අනු විෂයයකි. එයිනුදු පින්තූරයක් කළු සුදු ආකාරයෙන් ඉදිරිපත් කිරීම ඡායාරූප විනිශ්චයේදී ඔබේ ඡායාරූපයට වැඩි තක්සේරුවක් ලැබෙන අවස්ථාවක් වෙයි. අද අපි මේ සූදානම් වන්නේ වර්ණ ඡායාරූපයක් සිතැඟි පරිදි ජව ගන්වන ආකාරයයි.

පළමුවෙන් ම ඔබේ පින්තූරය ෆොටෝෂොප් මෘදුකාංගය මත විවෘත කර ගන්න. මේ පින්තූරය සංස්කරණය කිරීම සඳහා මා භාවිතා කළේ Photoshop CS5 සංස්කරණයයි.


දැන් එහි ඉමේජ් මෙනුවේ ඇජස්ට්මන්ට් හි ඇති බ්ලැක් ඇන්ඩ් වයිට් Image > Adjustment > Black & White  විධානය තෝරා ගන්න. ඊට ක්ලික් කළ විට සංවාද කොටුවක් මතු වෙයි.

 එහි ප්‍රීසෙට් Preset විකල්ප කොටුවේ ඩවුන් ඇරෝවට ක්ලික් කළ විට විකල්ප ගණනාවක ඩ්‍රොප් ඩවුන් ලිස්ට් එකක් මතු වෙයි. ඉන් ඉන්ෆ්‍රාරෙඩ් Infrared විකල්පය දුන් විට ඒ අනුව පින්තූරය කළු සුදු ආකාරයට පරිවර්තනය වෙයි.

 ඉන්පසු යතුරු පුවරුවෙන් කොන්ට්‍රෝල් සහ ජේ Ctrl + J (Layer via Copy) අකුරු එබීමෙන් එම ඉමේජයේ ම ලේයර් පිටපතක් සාදා ගත හැකි ය.


දැන් මේ සාදා ගත් නව ලේයරය මත හයිපාස් ෆිල්ටරය ආදේශ කළ යුතු ය. ෆිල්ටර් මෙනුවේ කෙළවරට වන්නට ඇති අදර් මෙනුවේ උප මෙනුවක් ලෙසින් හයිපාස් ෆිල්ටරය Filter > Other > High pass තිබේ. එම විධානය සක්‍රිය කළ විට සංවාද කොටුවක් මතු වෙයි. එහි ස්ලයිඩරය සීරු මාරු කිරීමෙන් ඔබට අවශ්‍ය ආකාරයට විස්තරාත්මක බව වැඩි වන ප්‍රමාණයට එය සකස් කර ගත හැකි ය.


දැන් මේ ෆිල්ටරය ආදේශ කළ ලේයරයේ බ්ලෙන්ඩින් මෝඩ් Blending Mode එක ඕවර්ලේ Overlay ලෙසින් දෙන්න.

ඉන්පසු බැක්ග්‍රවුන්ඩ් ලේයරය සක්‍රිය කොට එහි බ්‍රයිට්නස් කන්ට්‍රාස්ට් Image > Adjustment > Brightness Contrast ඔබට ඇවැසි පරිදි සකසා ගන්න. එසේ සැකසීමෙන් පසු මේ ලේයර් දෙක ම කොන්ට්‍රෝල් ඊ Ctrl + E විධානය මගින් මර්ජ් Merge කර ගත හැකි ය.
 
ඊට පසු ටූල් පෙට්ටියේ ඇති බර්න් Burn ටූලයෙන් (ළා තැන් අඳුරු කිරීම) සහ ඩොජ් Dodge ටූලයෙන් (අඳුරු තැන් ළා පැහැ කිරීම.) මුහුණේ ඇති සියුම් විස්තර Fine detail උලුප්පා ගත හැකි ය. 

මේ දැක්වෙන්නේ ඔබේ මුල් ඡායාරූපය සහ එය සංස්කරණය කොට අවසන් කළ විට දැක්වෙන ආකාරයයි.
 
මේ මුල් ඡායාරූපය මට ලබා දුන් හිතවත් රුවන් චින්තක මහතාට මගේ ස්තූතිය මෙයින් පිරිනමමි.

Share/Bookmark

Monday, May 21, 2012

Polar Panorama ධ්‍රැවීය පැනෝරාමා

ධ්‍රැවීය පැනෝරාමා පින්තූරයක් යනු කිසියම් දර්ශනයක් කුඩා රාමුවක් තුළ අංශක 360ක දර්ශනයක් ලෙස බලන්නට හැකි ලෙස සැකසීමයි. එය ඉතා ම පහසු ය.

පළමුවෙන් ම කළ යුත්තේ ධ්‍රැවීය පැනෝරාමාව සඳහා සුදුසු මූලික ඡායාරූප සැකසීමයි. ඔබ සතු ව මීට කළින් සාදන ලද පැනෝරාමා පින්තූරයකු වුවද ඒ සඳහා යොදා ගත හැකි ය.
එසේත් නැතිනම් කිසියම් සැලැස්මකට අනුව අදාල ඡායාරූප ගෙන, එය පැනෝරාමාවක් ආකාරයට සකසා ගත යුතු ය.

පළමුවෙන් ම ෆොටෝෂොප් මෘදුකාංගය විවෘත කර ගන්න.  දෙවනු ව, අලුත්, හිස්, සම චතුරස්‍රාකාර කැන්වසයක් සාදා එතුළට ඔබ සකසාගත් පැනෝරාමා ඉමේජය ගෙන එන්න.


 එම පින්තූරයේ අහසත් පොළොව පෙන්වන කොටසත් හැකි තරම් පුළුල් ව තිබේනම් වඩා හොඳ ය. දැන් මේ පින්තූරය එඩිට් මෙනුවේ ට්‍රාන්ස්ෆෝම් හි රොටේට් 180 Edit > Transform > Rotate 180 විධානය මගින් උඩුකුරු ලෙස හරවන්න. ඉන් පසු එය කැන්වසයේ ඉහළ කොටසට ගෙන යන්න. ඉමේජයේ දාරය කැන්වසයේ දාරයට වඩා ස්වල්පයක් වැඩි වන සේ විශාල ද කරන්න.

ඉන්පසු ෆිල්ටර් මෙනුවේ ඩිස්ටෝට් හි පෝලර් කෝඩිනේටස් Filter > Distort > Coordinates විධානය දෙන්න. එහි Rectangular to Polar රේඩියෝ බොත්තම සක්‍රිය කරන්න. සැණෙකින් ඔබේ ඉමේජය වෘත්තාකාර ව සැකසෙයි..!!




ඉන් පසු කළ යුත්තේ එහි හිස් තැන් සීරුවෙන් පිරවීම ය.

Share/Bookmark

Friday, April 20, 2012

ඇන්ද වගේ පින්තූර

ඔබ ඔබේ ම කැමරාවෙන් ගත්තු පින්තූරයක් ඇන්ද වගේ දකින්න ආසයි ද..?


පුංචි වැඩක් කරමු...!
ඉස්සෙල්ල ම ඔබ ගත් පින්තූරයක් ෆොටෝෂොප් මෘදුකාංගය මත විවෘත කර ගන්න.

එහි දකුණු පස ලේයර් Layer නමින් පැලටයක් තිබේ. නැතිනම් වින්ඩෝ මෙනුවට ගොස් එහි ඇති ලේයර් විධානයට ක්ලික් කළ විට ලේයර් පැටය ද තිරය මතට එයි. 

ඒ ලේයර් පැලටය මත ඔබේ ඉමේජය තිබෙන්නේ බැක්ග්‍රවුන්ඩ් නමිනි. දැන් යතුරු පුවරුවේ කොන්ට්‍රෝල් යතුර සමග ජේ Ctrl + J අකුර ඔබන්න. එවිට ලේයර් පැලටය මත Layer 1 නමින් තවත් ලේයරයක් සෑදෙන අයුරු ඔබට පෙනේවි.

මේ ලේයර් මත ක්ලික් කළ විට සක්‍රිය වන්නේ අදාල ලේයරය පමණි. එනම් ඔබ සිදු කරන ඕනෑම සංස්කරණයක් සිදු වන්නේ මේ සක්‍රිය ලේයරය මත පමණකි. 


දැන්  මේ ලේයර් පැලටයේ උඩ වම් කෙළවරේ ඇති නෝමල් ලෙසින් පෙනෙන මෝඩ් විකල්පය දෙස බලන්න. එහි ඇති ඩවුන් ඇරෝවට ක්ලික් කළ විට විකල්ප ගණනාවක් පහළට දිග හැරෙයි.  එයින් කලර් ඩොජ් විකල්පය තෝරන්න. Layer > Blending Mode > Color Dodge සැනෙකින් ඒ ලේයරය මත ඇති පින්තූරයේ වර්ණ අන්තරය දැඩි ව පෙනෙන්නට පටන් ගනියි. 

ඉන් පසු ඔබ කළ යුත්තේ ඉමේජ් මෙනුවේ එජස්ට්මන්ට් හි ඇති ඉන්වර්ට් උප මෙනුව Image > Adjustment > Invert සක්‍රිය කිරීමයි. දැන් මේ ලේයරය මත ඇති ඉමේජය සුදු පැහැ වෙයි.


 අවසාන ව ඔබ කළ යුත්තේ ෆිල්ටර් මෙනුවේ බ්ලර් හි, ගෟෂන් බ්ලර් උප මෙනුව Filter > Blur > Gaussian Blur සක්‍රිය කිරීමයි. එවිට සංවාද කොටුවක් මතු වෙයි. එහි ඇති රේඩියස් Radius ස්ලයිඩරය තිබෙන්නේ ඔබට එහා මෙහා කර බලන්නටයි...!!!!




Share/Bookmark

Wednesday, May 25, 2011

ස්ටාර් ෆිල්ටරයක් හදමු

ස්ටාර් ෆිල්ටරය Star Filter යනු ඡායාරූප ශිල්පීන් අතිශය කැමැති පෙරණ වර්ගයකි. ඡායාරූපයේ දිලිසෙන තැන් මෙන් ම ආලෝක ලප මත ද තරුවක හැඩැති දිදුලවීමක් සටහන් කරන බැවින් ඉන් ඡායාරූපයට ලැඛෙන්නේ අතිශය සුන්දර වටිනාකමකි. ස්ටාර් ෆිල්ටරයක් තරමක මිලක් වුව ද, එය නිරන්තරයෙන් ම කාචය මත සවි කොට ඡායාරූප ගතහොත් සියලූ ම රූප කොටස් මත ඇසට පෙනෙන නොපෙනෙන දිදුලවීම් සටහන් වන නිසා එම ඡායාරූපය පමණට වඩා ඩිෆියුස් වී පෙනීම සිදු වේ. එය එතරම් සුබ කාරණයක් නොවේ. එනිසා ෆොටෝෂොප් ශිල්පියෙකු ට අවශ්‍ය තැනට පමණක් මේ ෆිල්ටරය යෙදීමේ වාසනාවන්ත පහසුකම ලැබේ. ඔබ මේ ෆිල්ටරයක් සාදා ගත යුත්තේ ජීවිතයට ම එක් වරක් පමණි. ඊට කිසිම මිලක් වැය නොවන අතර පසුව වුව ද අමතර වියදමක් සිදු නොවේ.

දැන් අපි පියවරෙන් පියවර මේ ෆිල්ටරය සාදා ගන්නා අයුරු බලමු.


පළමුවෙන් ම අලූත් කැන්වසයක් සාදා ගන්න. එහි රෙසොලුෂන් 300ppi, දිග පළල පික්සල් 500 බැගින් ද විය යුතු ය. එහි නම Star Filter ලෙස නම් කරන්න. පසුබිම ට්‍රාන්ස්පේරන්ට් Transparent වීම වඩා පහසු ය.
දැන් මේ හිස් කැන්වසය මතට ගයිඩ් ලයින් දෙකක් දමා ගන්න. මෙම ගයිඩ් ලයින් නිවැරදි ව කැන්වසයේ හරි මැදට දමා ගැනීම අපහසුනම්, විධානය දී මුළු කැන්වසය ම සිලෙක්ට් කර ගන්න. ඉන් පසු ඕනෑම සිලෙක්ෂන් ටූලයකට ගෙන, ඉන් මේ කැන්වසය මැදට රයිට් ක්ලික් කරන්න. එවිට මතුවන මෙනුවෙන් ට්‍රාන්ස්ෆෝම් කොන්ට්‍රෝල් විධානය දෙන්න. එවිට මේ සිලෙක්ෂන් එක වටා නෝඩ් මහිත කොටුවක් සෑදේ. දැන් රූලරයට ක්ලික් කොට ඇද ගෙන ආ විට ඉබේ ම ගයිඩ් ලයින් එකක් සෑදේ. (රෑලරය පෙනෙන්නේ නැතිනම් විව් මෙනුවේ මැද ඇති රෑලර්ස් මෙනුව සක්‍රිය කරන්න.) මේ ගයිඩ් ලයින් එක මූව් ටූලය මගින් ඇදගෙන යන විට හරි මැද දී පැටලෙන ගතියක් දැනේ. එ අයුරින් දෙපැත්තට ම ගයිඩ් ලයින් දෙකක් දමා ගන්න. ඉන් පසු ඉලිප්ටිකල් මාර්කී ටූලය Elliptical Marquee Tool තෝරා ගෙන ඉන් මේ කැන්වසය පිරෙන්නට වෘත්තයක් ඇඳ ගන්න. ශිෆ්ට් යතුර ඔබාගෙන ම ඇඳීමෙන් එය කළ හැකි ය. ඇඳුනේ කුඩාවට නම් සිලෙක්ෂන් ටූලයේ සිටිමින් ම රවුම මැදට රයිට් ක්ලික් කරන්න. මතුවන මෙනුවෙන් Transform Selection ඇක්ටිව් කරන්න. අවශ්‍ය ප්‍රමාණයට රවුම සකසා ගන්න.
රවුම සාදා ගත් පසු මේ සිලෙක්ෂන් එක කළු පාටින් පුරවා ගන්න. වර්ණය පුරවා ගත් පසු සිලෙක්ෂන් එක ඉවත් කරන්න. ඒ සඳහා සිලෙක්ට් මෙනුවේ ඩීසිලෙක්ට් Select > Deselect විධානය හෝ Ctrl + D ෂෝට් කට් එක හෝ භාවිතා කරන්නට පුලුවන. ඉන්පසු බ්‍රෂ් ටූලය ඇක්ටිව් කොට පින්සලයේ වට ප්‍රමාණය 9ක් පමණ වනසේ සකසා එහි බ්‍රෂ් පැලටයට යන්න. එහි මුලින් ම ඇති ෂේප් ඩයිනමික්ස් Shape Dynamics හි Size Jitter හි Control කොටුව ෆේඩ් Fade ලෙස තෝරා පික්සල් ප්‍රමාණය 200ක් කරන්න. එමෙන් ම බ්‍රෂ් ටිප් ෂේප් Brush Tip Shapeහි යට ම ඇති ස්පේසින් Spacing යන්න හැකි තරම් අවම කරන්නත් අමතක කරන්න එපා. එහි පරතරයක් තිබුනොත් ඉර සටහන් වන්නේ තිත් තිත් ලෙසිනි.
ලේයර් පැලටයේ යට ම ඇති කඩදාසියක් නැවුවා වැනි ක්‍රියේට් නිව් ලේයර් Create New Layer අයිකනයට ක්ලික් කොට, අලූත් ලේයරයක් සාදා ගන්න. කැන්වසයේ හරි මැද ට බ්‍රෂ් තුඩ තබා ශිෆ්ට් යතුර ඔබාගෙන ම ක්ලික් කොට ඩ්‍රෑග් කරන්න. එවිට ක්‍රමයෙන් කෙළවර සිහින් වන රේඛාවක් ඇඳේ. මේ ආකාරයට හතර පැත්තට ම රේඛා ඇඳ ගන්න.

රේඛා සහිත ලේයරය ක්‍රියේට් නිව් ලේයර අයිකනය මතට ඩ්‍රෑග් කිරීමෙන් හෝ Ctrl + J විධානය දීමෙන්, නව පිටපතක් සාදා ගන්න. ඉන්පසු ෆ්‍රී ට්‍රාන්ස්ෆෝර්ම් Ctrl + T විධානය මගින් ඒ දෙවන රූපය තරමක් කුඩා කොට, ඔප්ෂන් බාරයේ ඇති ඈන්ගල් Angle කොටුව මත 45 ටයිප් කරන්න. සැනෙකින් රූපය අංශක 45 කට කරකැවේ.
දැන් මේ රේඛා සහිත ලේයර දෙක ම ලින්ක් කොට මර්ජ් Merge කර ගන්න. එය කරන්නට නම් පළමුව Ctrl යතුර ඔබාගෙන ම පැලටය මත එම ලේයර් දෙකට ක්ලික් කරන්න. ඊට පසු ලේයර පැලටයේ දකුණු උඩ දාරයේ ඇති සයිඩ් ඇරෝවට ක්ලික් කළ විට මතුවන මෙනුවෙන් මර්ජ් ලින්ක් Merge Link නැතිනම් (Ctrl + E) විධානය දෙන්න. සැනෙකින් ලේයර දෙක ම එකක් බවට පත් වෙයි. දැන් මේ කතිර රූපය පමණක් සිලෙක්ට් කර ගත යුතු ය. කන්ට්‍රෝල් යතුර ඔබාගෙන ම, ලේයර් තම්නේලයට ක්ලික් කළ සැණින් එම රූපය සිලෙක්ට් වෙයි.
මේ රූපය සිලෙක්ට් කළ පසු එය දේදුනු වර්ණයෙන් වර්ණ ගන්වා ගත යුතු ය. එය ඉතා පහසුවෙන් ග්‍රේඩියන්ට් ටූලයෙන් Gradient Tool ඉටු කර ගන්නට හැකි ය. දැන් ග්‍රේඩියන්ට් ටූලය ඇක්ටිව් කොට, ඔප්ෂන් බාරයේ ග්‍රේඩියන්ට් පැලටයෙන් වර්ණ විශාල සංඛ්‍යාවක් ඇති ස්පෙක්ට්‍රම් Spectrum විකල්පය තෝරාගෙන ඊට ඩබල් ක්ලික් කරන්න. එවිට ග්‍රේඩියන්ට් එඩිටර් Gradient Editor සංවාද කොටුව මතු වෙයි. එහි ස්ලයිඩරය මගින් වර්ණ අවශ්‍ය පරිදි සකසා ගන්න. ආරම්භය වඩා සුදු ලෙස සකසන්න.
දැන් ඔප්ෂන් බාරයේ ඇති 2 වැනි රේඩියල් ග්‍රේඩියන්ට් ටැබ් එකට ක්ලික් කොට සිලෙක්ට් වී ඇති රූපයේ හරි මැද සිට කෙළවරට ග්‍රේඩියන්ට් එක යොදන්න.දැන් Ctrl + D විධානය මගින් සිලෙක්ෂන් එක ද අහෝසි කරන්න. ඊට පසු ෆිල්ටර් මෙනුවේ බ්ලර් හි ගෂන් බ්ලර් විධානය Filter > Blur > Gaussian Blur මගින්, මේ කතිරය තරමක් බ්ලර් කරන්න. ඉන්පසු ගයිඩ් ලයින් මූව් ටූලය මගින් නැවත රූලරය දෙසට ඇදගෙන ගොස් අත හැරීමෙන් ඉවත් කර ගන්න. ඉන් පසු මේ වර්ණ ගැන්වූ කතිරය, යට ඇති කළු රවුම සමග මර්ජ් ලින්ක් කර ගන්න.දැන් ෆිල්ටර් මෙනුවේ රෙන්ඩර් හි ලෙන්ස් ෆ්ලෙයාර් ෆිල්ටරය Filter > Render > Lens Flair තෝරන්න.

මතුවන සංවාද කොටුවෙන් රූපයේ පෙනෙන ආකාරයට අදාල දත්ත සකසන්න. දිදුලන ස්ථානය මවුස් පොයින්ටරයෙන් ක්ලික් කරන තැන නවතින නිසා නිවැරදි ම ස්ථානය තෝරා ගන්න. එය කතිරයේ හරි මැද නොවිය යුතු යි.
10 රූපය. දැන් අප අවසාන අදියරට පැමිණ සිටින්නෙමු. ලෙන්ස් ෆ්ලෙයාර් ෆිල්ටරය යෙදූ රූපය සහිත ලේයරයේ මෝඩ් එක ස්ක්‍රීන් Screen ලෙස වෙනස් කරන්න. කිසි ම වෙනසක් ඔබට නො පෙනෙයි.

දැන් මෙසේ සාදා අවසන් කර ගත් මේ ගැජට්ටුව, පහසුවෙන් සොයා ගත හැකි, අමතක නොවන තැනක Star Filter නමින් ම, ටිෆ් ගොනුවක් Tiff File ලෙස සේව් කර ගන්න. එහි කලර් මෝඩ් Colour Mode එක RGB ලෙසින් තිබිය යුතු ය. CMYK විය යුතු නම් එය අවසානයේ දී කළ යුතු ය.

ඊට පසු මේ ස්ටාර් ෆිල්ටරය ඔබ කැමැති අදාල වන රූපයක් මතට ඩ්‍රෑග් කොට බලන්න. කොපි පේස්ට් කිරීමෙන් එය නිවැරදි ව ක්‍රියාත්මක නොවේ. එහි මෝඩ් එක ස්ක්‍රීන් නිසා කළු පැහැය නොපෙනෙයි. නමුත් අනෙකුත් වර්ණ සියල්ල ම පෙනෙයි.

Share/Bookmark